Осы жаздың алғашқы айында ғана жаңа синглмен қайта оралған q-pop жұлдыздары ел мүлдем күтпеген мәлімдеме жасады. Топтың тарау ықтималдылығы жайлы әнші жігіттер өздері желіде хабарлады.
Алғашында топтың белді мүшесі ZAQ-тың топтан кетуі мүмкіндігі туралы сыбыс естілген-ді. Алайда, одан кейін шығармашылық ұжым ресми мәлімдеме жасаған жоқ. Кейінірек «Азия дауысы» фестиваліне ZAQ соло орындаушы ретінде қатысты.
![91 тобы тарауы мүмкін](https://n1s1.hsmedia.ru/a5/c6/f1/a5c6f12f598099fb9164a5d5ba4c3449/728x424_1_dfd4a4dd53635e98fe241bf75b7f51ef@1080x629_0xzDu7q8zL_6515329919015372001.jpg)
Ал осыдан бірер күн бұрын TikTok әлеуметтік желісінде жігіттердің оқырман сұрақтарына жауап беріп жатқан видеосы тарады. Музыкалық ұжым сұрақ-жауап барысында топтың болашаққа жоспарына тоқталды — жігіттер белгісіз мерзімге демалысқа кетпек.
«Біз қысқа дейін концерт береміз. Содан кейін белгісіз мерзімге, 1-2 немесе 3 жыл үзіліс жасауды жоспарлап отырмыз. Мүмкін, әрқайсымыз өз жолымызбен кететін шығармыз. Мүмкін, бағытымыз өзгерер. Біз қазіргі образымыздан демалып, үзіліс жасағымыз келеді. Қайтып келсек те, бәрі бұрынғыдан өзгеше болуы мүмкін», — деді топ мүшесі AСE.
Бұл, әрине, топ жанкүйерлерін мұңайтты. Алайда, жастары 30-ды шамалаған жігіттердің өз жолдарымен кеткенін құптайтындар да табылды.
Топтың ықтимал тарауына шығармашылық кризиспен қатар, отбасылық ересек өмір де сеп болуы ғажап емес. Өткен жылы топтың екі мүшесі отбасын құрды — ZAQ пен ALEM. ALEM-нің жары — көпшілікке танымал блогер, модель Вероника Жанғалова.
Не болса да, q-pop негізін қалап, жастай аңызға айналып үлгерген топ мүшелеріне шығармашылық табыстар тілейміз!
Айда кетейік, топтың GAP атты турының аясында 25-тамыз Астанада және 1-қыркүйек Алматыда концерттері өтеді.