Алтыншы Дүниежүзілік көшпенділер ойындарының ашылу салтанаты қазақстандық қоюшы топ ұйымдастырған ең есте қаларлық шоулардың бірі ретінде тарихта қалатыны сөзсіз. Париж Олимпиадасы да қалыс қалғандай! Шоудың режиссері Андрей Хван болды. Қойылымның негізіне көшпенділер мәдениеті, заманауи хореография және мультимедиялық шешімдердің үйлесімі алынды.
Ұйымдастыру жұмыстарымен портфолиосында ірі концерттік және мәдени жобалар, соның ішінде Қайрат Нұртастың Алматыдағы Орталық стадионда өткен жеке концерті мен «Гакку Дауысы» шоуы бар Wakeuphana командасы айналысты. Салтанатты дайындауға сценарий әзірлеуден бастап толық жүзеге асыруға дейін шамамен бір жыл уақыт кетті. Музыкалық бөлімге продюсер Ержан Серікбаев, техникалық қамтамасыз етуге Ілияс Тельтаев жетекшілік ететін Upstage компаниясы, ал графикаға Filmotion студиясы жауап берді.
Жобаға шетелдік маман — BTS, Билли Айлиш және Джастин Бибермен жұмыс істеген хореограф Keone Madrid те тартылды. Сахнада Қазақстан, Қырғызстан, Өзбекстан және Ресейден келген қатысушыларды біріктірген халықаралық WakeUp Camp жобасының 2000-ға жуық бишісі өнер көрсетті.
Салтанат бірден әлеуметтік желілерде кеңінен талқыланды: қолданушылар қойылымның ауқымы мен визуалды бөлігінің сапасын жоғары бағалап, ашылу рәсімінен түсірілген кадрлар интернетке жылдам тарап кетті. «Біз үшін жай ғана әсерлі ашылу салтанатын жасау емес, әлемнің кез келген нүктесіндегі көрерменге түсінікті, көшпенділер мұрасы туралы заманауи тарихты баяндайтын үлкен мәдени үндеу жасау маңызды болды», — деді Андрей Хван.
Алтыншы Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтіп жатыр. Бағдарлама дәстүрлі спорт түрлері бойынша жарыстарды, сондай-ақ түрлі елдердің өкілдері қатысатын мәдени іс-шараларды қамтиды. Салтанатты қою Қазақстанның креативті индустриясы үшін жергілікті мамандар мен шақырылған шетелдік сарапшылардың басын қосқан халықаралық деңгейдегі маңызды жоба болды.
